 Gunnhildur Garðarsdóttir hafnaði í 12. sæti af 59 keppendum í skylmingum með höggsverði í flokki U17 ára á heimsmeistaramótinu í Bakú í Aserbaídsjan í morgun.
Gunnhildur vann fjóra bardaga af sex í riðlakeppni og var í 14. sæti fyrir útsláttarkeppnina. Hún sat því hjá í 64 manna úrslitum og fór beint í 32ja manna úrslit. Þar lenti Gunnhildur á móti pólsku stúlkunni Malgorzata Turek og vann hana, 15:8. Í 16 manna úrslitum tapaði Gunnhildur síðan fyrir Ji Yeon Seo frá Suður-Kóreu, 10:15.
Gunnhildur keppir í U20 ára flokki á mótinu á miðvikudaginn ásamt Sigrúnu Ingu Garðarsdóttur.
Sjá úrslit mótsins á: http://www.fencingworldwide.com:8080/WAFechten/index.jsp?wettkampf=jwm10 | 
Norðurlandameistaramótið í skylmingum með höggsverði verður haldið í Helsinki, í Finnandi dagana 24.–25. apríl 2010. Alls taka 30 íslenskir keppendur frá tveimur skylmingafélögum þátt í mótinu og keppa þeir í 9 flokkum auk liðakeppni.
Evrópumeistaramótið í skylmingum unglinga (U18) verður haldið í Aþenu í Grikklandi dagana 1. – 6. mars 2010. Þátttakendur eru yfir 300 og koma frá 35 löndum. Þrjú ungmenni á aldrinum 15 til 17 ára hafa verið valin til þátttöku fyrir hönd Íslands og keppa þau í skylmingum með höggsverði. Þrátt fyrir ungan aldur eru þetta allt margverðlaunaðir skylmingamenn bæði hérlendis sem og erlendis enda eru hér bæði Íslandsmeistarar og Norðurlandameistarar á ferðinni.